RETROSPECTIVA: O MOZO PETER JACKSON

Sir Peter Robert Jackson, máis coñecido como Peter Jackson é un director neozelandés mundialmente coñecido por levar á gran pantalla a triloxía d’ O Señor dos Aneis.

Pero antes de que este director fixera as delicias dos máis fanáticos do fantástico empezou a súa carreira con obras de baixo orzamento que por estética, humor, e por temática encaixan perfectamente dentro do cinema freak que tanto reivindicamos.

A primeira etapa cinematográfica deste director, na que incluímos Braindead, está formada por tres filmes de baixo orzamento, nos que os regueiros de sangue, a violencia e provocar incomodidade no espectador son marca da casa. Esta “triloxía” á que bautizamos como a etapa de “O mozo Peter Jackson”, inclúe o filme xa mencionado, Bad Taste (1987) e Meet the Feebles (1989).

Deste xeito, nesta edición, no GFFF abandeiramos Braindead, que cumpre neste 2022 trinta anos desde a súa estrea, como o noso filme homenaxeado. Xunto a proxección do filme, proxectarase Bad Taste creando unha retrospectiva da primeira etapa creativa deste director co obxectivo de mostrar ao público a súa evolución desde os seus inicios ata o momento no que se convertiu en lenda por levar a Terra Media á gran pantalla.